”يا الحكومة ربّي في الوجود”

سمعت بتشبيه للحكومة قالّك طاقم متاع سفينة رُبّانها(من الرُّبّ) الغنّوشي محمّد و قبطانها المبزّع فؤاد دورها إيصال السّفينة إلى برّ الأمان…على أنا سفينة يحكيو الله أعلم الحاسيلو قبل ما كانش عنّا لا سفينة و لا والو كان بن علي و جماعتو في غوّاصة و الشّعب يعوم و حوت ياكل حوت و الموجة الغدّارة و اللّي يعوم في الشّايح و اللّي يخاف ملغارق و اللّي غارق في الدّيون غارق و اللّي الحارق للطّليان حارق و اللّي سارق يخت سارق و اللّي يربّي في الحوت يربّي و الموش متربّي موش متربّي و الملّولّي جابها و جا و اللّي بلّ حوايجو و اللّي شاح يلبس و اللّي يصطاد ما يصطادش للربّي و التّوريست وفات فلوسو و أوسّو على روحو و القرنيط مهرجان و برّة و المرجان كمال و مازال مازال و الضّريع هات شعندك و القرصان لا تباركلو و حنّبعل2 في حومتهم و الشّكارة و البحر و ياببح و ياببح ولد البحر بح و اللّي يشرب يشرب بالشّفاء و اللّي بمايو و اللّي بلاش و الببّوش ماثمّاش و الحبار وفا و غلّة البحر السّماح  و عمّار عندو شاطئ مهيّئ و الحماية ضربة ضربة للحُرّيقة و البحورات السّبعة الأبيض و الأحمر و الأسود و الميّت و الموف و الفيولي و اللّي هوا تي الماء الكلّو ممسّخ